معلش يا خال
×××××××××××
ازيك يا خاااااااال
عامل ايه وعاملين ايه العيال
عارفك هتقولى تمام وعال العال
واشوف بسمتك وعلى كتفك حمل جبال
تضحك ضحكة رضا وتصبر نفسك بدندنة موال
اوعى تكون زعلت لما قلتلك اسكت يا خال
اصلى ابن اختك لسانه طويييييييييل
×××××××××××××××××××××
والله وكبرت يا واد والبياض فى شعرك بان
وعنيك شايلة الهم وضايع منها الامان
خدها نصيحة يا ولدى من واحد غلبان
البلد عشان تتقدم وتتعدل
يبقى لازم ترجع تانى لزمان
واوعى تقصر لسانك ... مشكلتكم انكم من غير لسان
بقى انا ازعل منك يا عويل
×××××××××××××××××
تعبنا قوى يا خال وتقل هم الايام
وهرونا فتى يا خال ده حلال وده حرام
طب انت عارف الدولار بقى بكام ؟
الكهربا بكام ؟
البنزين بكام ؟
والله العظيم حرام
شكلها ايام طيييييييين
×××××××××××××××××
مش عاجباك البلد يا ولدى سيبها وسافر
هاجر
واكتب على باب قلبك . يا بلد انا مهاجر
وريح نفسك بكلمة انها بس للأكابر
هاه هتغادر ؟
هتسافر ؟
ياد يا اهبل دى بلدك .. ولو كانت شوية مقابر
لو بعدت عننا .. هتقدر تبعد عن اللى فيها مدفونين ؟
××××××××××××××××××××××××××××
ده انت غلبان يا خال
فاكرها لسة البت ام خلخال
ما اتغير الحال
والجلبيه بقت سعودى ... وأكلنا الحمير والجمال
لما الدماغات بقت شمال
ده حتى بطولة افريقيا خدتها السنغال
والانتخايات تجيبك بس دورتين
دروة مية سيدات .... والتانية رجال
شكلك هتودينى حيث السجن اصلاح وتأهييييييييل
××××××××××××××××××××××
فاكر يا واد لما كنت تدفس صباعك فى اللبن الرايب
وستك تلف تجيبهولك من الحبايب والقرايب
مرة من بيت جرجاوى ومرة من بيت الراهب
كنا حبايب
حتى طينة الارض ماكانش فيها رواسب
سلمنالكم القلوب نضيفة من غير خرايب
مش زى زمنكم العايب ابو وش شاحب
×××××××××××××××××××××××
زماننا هواه اتلوث واتلوثت الهوية
ومابقناش عارفينها .... عربية ولا مصرية
واتغيرت الاغنية ... وبقت مهرجانات شعبية
وطائفية
سنية شيعية
كاثوليكية بروتستانية ارثوذكسية
مهلبية بالملوخية
والحرامى لبس عباية الدين
ومحدش يتكلم خليكوا ساكتين
احسن ينفضوا الفراجية وتلبس فى حرمين
او يكفروك وتبقى من المارقين
××××××××××××××××××××
اصبر يا ولدى علشان....
يووووه انت تانى يا خال
هتفرج يا ولدى
ورحمة ابوك مش عايز اقولها يا خال
دى بلدك نعمة
عايز تزعل ازعل .... بس اسكت يا خاااااااال
ليست هناك تعليقات:
إرسال تعليق