من كتابات 2014
===========
إله ملاكى
===========
عايز إله ليا لوحدى
يدخل اللى باكرههم النار
ويدخلنى الجنة لوحدى
ومعايا بس اللى عايزهم
ممكن ابويا وامى وجدى
علشان الناس كلها غلط
وانا اللى صح .... لوحدى
واللى يخالفنى يبقى كافر ومالوش دية عندى
هيرميه الهى فى النار
ويحطنى فى الجنة لوحدى
مش شايف حد صح غيرى
وغيرى اللى يخالفنى يبقى ضدى
ولا يدخلش معايا الجنة بتاعتى
اصل الجنة دى بتاعتى لوحدى
وباقى الناس دى مخلوقة
علشان تخدم عندى
ويفضلوا كده طول العمر لغاية العمر ما يعدى
بعدها يطلع عين ابوهم فى النار
واتمتع انا فى الجنة لوحدى
ولما يقولو
وهو فين عدل ربنا
يقولك العدل انك ماتبقاش ضدى
وفـ حسبة ان انا صاحب الجنة
حكاية العدل دى بتعدى
والرحمة المغفرة باستحقها لوحدى
اصل ده الهى لوحدى
معايا اسراره لوحدى
وطريقه اعرفه لوحدى
وماشى فيه لوحدى
علشان كده الجنة ليا لوحدى
ده مبدأى ومبدأ ابويا وجدى
عدت سنين على كده
ولسة سنين هتعدى
ولو ربنا قال للناس
انتوا داخلين الجنة
هأقوله
على فكرة دى جنتى لوحدى
هانى ملاك
ليست هناك تعليقات:
إرسال تعليق