مكالمة مع الخال
\\\\\\\\\\\\\\\\\\\\\\\
جبت للواد كباية زبادى وكان فيها كود يكسبك 10 دقايق فقلت اكلم الخال
يمكن
يمكن
يكون لسة فى ممكن .
\\\\\\\\\\\\\\\\\\\\\
جرس
ألو
إزيك يا خال
إيه أمال
مال صوتك ضحكته مارناش
وبسمته ماطلعاش
إنطفى جواك الأمل
علشان زينا مامعاكاش
ولا لسة ما إنطفاش
=========
هى لماضة لسانك ماهتبطلهاش
مستورة والحمد لله
دول شوية برد بس مايجراش
المهم اخبارك ايه
لساك شايف الايام شوية اوباش
تخدمك لو معاك
وتلطشلك لو ممعاكاش
بس باينله يا واد معاك
ولا بتتكلم ببلاش
. بأتكلم ببلاش
من غطا زبادى ماكلتهاش
. ليه ؟ مش بتاخد مرتب
. باخد
وحوافز ومكافآت
. باخد
بس خد بالك
. ماكفاية يا خال حد غيرى ياخد
هو ليه كله فى الغلط بيدينا
على قفانا بيدينا
على عقولنا بيدينا
ده حتى محمد رمضان بيدينا
فى العشة
فى الجركن
فى الارض تفحر
كتر خيره بيدينا
وإحنا بناخد
\\\\\\\\\\\\\\\\\\\\\\\
إتلم يا واد يلعن أبو شكلك
هى دى الرباية اللى ربوهالك أهلك
. حاضر يا خال
بس أتلم أكتر من كده إيه
ده مفيش حاجة بيجيبها الجنيه
ده أنا لو فطرت فول أبقى بيه
طب إيه ؟؟؟
أعمل إيه
الحالة بقت عفن
والأمل شكله إندفن
حتى الرغبة صابها الوهن
ده أنا حبيت الحياة
علشان اوفر على اهلى تمن الكفن
شوفت فى حياتك زى ده زمن
طب امبارح عدى وعلى جنب إتركن
والنهادرة معاند مليان محن
بس بكرة
المهم بكرة
ياترى
هيلاقيله جوه الأمل سكن ؟
ولا نلمله من بعض تمن الكفن ؟
#هانى_ملاك
هانى ملاك
ليست هناك تعليقات:
إرسال تعليق